Talata Volonondry :
Ny mpizahatany vahiny koa aza liana amin'ny koba sy saosisy malaza eto !

« Mbola kely izahay no efa ity no namelomany anay zanany naterany », hoy ilay zananivavy miara-mivarotra aminy io.

Mbola mitoetra foana ny anarana "Talata Volonondry" na efa zavatra hafa indray izao no malaza ao amin'ity tanàna ity. Tsy inona izany fa ny koba sy ny saosisy mahasarika hatramin'ireo mpizahatany vahiny, izay tonga hijery na hanandrana ny tsirony. Talata Volonondry dia tanàna iray eo amin'ny 27 kilaometatra, somary avaratra atsinanan'Antananarivo renivohitr'i Madagasikara. Renivohitry ny kaominin'ambanivohitr'i Talata Volonondry izy, ary ao anatin'ny distrikan'Antananarivo-Avaradrano, faritr'Analamanga.

Ankoatry ny lafiny tantara mety ho hita rehefa mankaty Talata Volonondry satria avaratry ny tanànan'Ambohidrabiby no misy azy. Marihina fa Ambohidrabiby dia anisan'ny niandohan'ny fanjakana teto Imerina. Ankehitriny, ny lafiny fahaizana mahandro sakafo koa izao lasa tafiditra ao anatin'ny zavatra azo tsidihina ho an'ny mpizahatany tonga eto.

Toy ny fanaony, rehefa miditra ny tanànan'i Talata Volonondry ny taksibrosy, na mianavaratra io, na mianatsimo, dia miato kely mandritra ny minitra maromaro no sady manala voyazera. Raha vao mahita ny taksibrosy mijanona kosa ireo mpivarotra koba sy saosisy dia mihazakazaka avy any manatona sy mitangorona eo. Toy izany koa, ny mpandeha midina ao an-tanàna eo amin'ny fijanonana sy fanalàn'ny taksibrosy mpandeha dia tsenain'ny mpivarotra koba sy saosisy. Tsy ny teratany malagasy ihany anefa no mankafy ny koba sy ny saosisy eto Talata Volonondry. Hatramin'ireo mpizahatany vahiny koa aza efa mahafantatra ny lazany ary misy voasarika manketo Talata Volonondry, hijery na hanandrana ny tsirony, araka ny hita tamin'ny fotoana nandalovanay nanao fanadihadiana teto.

Ifandovana

Ankoatry ny fambolena sy ny fiompiana, anisan'ny fotopiveloman'ny mponina eto Talata Volonondry ny fanaovana sy fivarotana koba sy saosisy. Misy ireo nanao izany ho fivelomana efa am-polotaonany. Lasa ifandovana aza ny fanaovana sy fivarotana koba sy saosisy satria misy efa nanomboka nanao izany hatrany amin'ny raimandreniny dia mandimby manao koa ny zanany.

Toy izany, ohatra, no hita tao amin'ny toeram-pivarotana iray mifanila amin'ny biraon'ny kaominina, ary tsy lavitry ny tsena. Samy mivarotra saosisy sy koba ilay reniny sy ny zanany vavy. Ny toeram-pivarotana no iraisana fa ny entana amidy kosa samy manana ny azy. Tokotokony eo amin'ny dimampolo taona mihoatra eo ny reniny. Ilay zanany vavy indray "Efa manam-bady io!", hoy ireo tovolahy anankiroa mivarotra koba sy saosisy koa, izay mifanila aminy sady toran'ny hehy amin'io.

Rehefa nanontaniana ilay reniny hoe oviana no nanaovany sy nivarotany koba sy saosisy, ary koa mahavelona tsara ve izy io dia nambarany fa efa aman-taonany maro. "Mbola kely izahay no efa ity no namelomany anay zanany naterany", hoy ilay zananivavy miara-mivarotra aminy io. Mikasika ireo karazan'olona tonga manjifa ny koba sy saosisy amidiny eto indray dia nambarany fa tsy Malagasy ihany fa misy aza hatramin'ny mpizahatay vahiny. Voamarina tokoa izany satria tsy ela taorian'io resadresaka nifanaovana taminy io dia nisy lehilahy miaraka amina vehivavy samy mpizahatany vahiny tonga teo amin'ny tsena fivarotan'ilay vehivavy mpanamboatra sy mpivarotra koba sy saosisy voalaza eto ity. Ankoatry ny eto Talata Volonondry dia manana tsena fivarotana koba sy saosisy koa izy aty Antananarivo renivohitra, araka ny nambarany.