Hita eny amin'ny sehatra toy ny Facebook sy WhatsApp ny dokambarotra momba ireo fiofanana ireo, izay mampanantena fahaleovantena ara-bola sy fahombiazana haingana. Lasa tsena mihitsy ny fizarana fahalalana, ary indraindray dia lasa loharanom-bola lehibe ho an'ireo mpampiofana izany.

Araka ny fanadihadiana sy antontan'isa navoakan'ny « Trading Economics » ny volana aprily, dia mbola marefo ny tolotra arak'asa eto Madagasikara. Midika izany fa vitsy ny asa ofisialy sy maharitra azon'ny olona idirana, indrindra ho an'ny tanora.

Izany fahabangana izany no manosika ny olona hiroso amin'ny asa antselika, izay ahafahana mahazo vola haingana na dia tsy azo antoka aza ny ho aviny. Ny fiakaran'ny vidim-piainana sy ny fahasarotan'ny fiainana andavanandro dia manampy trotraka izany toe-javatra izany.

Voka-dratsy sy tombontsoa

Na dia manampy betsaka amin'ny fiveloman'ny olona aza ireo asa vaovao ireo, dia misy ihany koa ny fanamby aterany. Tsy voafehy ara-dalàna ny ankamaroan'ireo asa antselika, ka mety hiteraka olana amin'ny fiarovana ny mpiasa sy ny mpanjifa.

Etsy ankilany, manampy amin'ny fampihenana ny tsy fananana asa izy ireo, ary manome fahafahana ho an'ny olona maro hivelatra sy hianatra fahaiza-manao vaovao. Mampiseho ihany koa izany fa mahay mandrindra sy mamorona vahaolana ny Malagasy, na dia ao anatin'ny fahasahiranana aza.

Raha fintinina, dia maneho fiovàna lehibe eo amin'ny rafitra ara-toekarena eto Madagasikara ny firongatry ny asa antselika sy ny fivelomana vaovao. Na dia vokatry ny fahasarotan'ny toe-karena aza izany, dia lasa sehatra ahafahan'ny olona mivelona sy mivoatra.

Ny fanamby lehibe ankehitriny dia ny fomba hahafahana mandrindra sy manatsara ireo asa ireo, mba hahatonga azy ho maharitra sy mahasoa kokoa ho an'ny rehetra. Amin'izay dia tsy ho vahaolana vonjimaika fotsiny izy ireo, fa ho lasa fototra iray hananganana toekarena matanjaka sy mirindra.

Yves Rindra