Asa amin'ny sambo "cruise ship" :
Mandray mpiasa avy amin ny firenena maro, anisany i Nomena Jacques Euraldo

Asa iray efa maro mpanao nefa mbola tsy dia fantatra loatra eto Madagasikara ny asan'ny tantsambo amin'irony antsoina hoe "Cruise Ship" irony na "bateau de croisière". Misy amin'izy ireny mandray mpiasa avy amin'ny firenena maherin'ny fitopolo ka anisan'izany ny teratany malagasy Nomena Jacques Euraldo, izay monina any ivelany ankehitriny. Mikasika izany dia manazava ny tontolon'ny asa tatsambo amin'ny sambo « cruise ship » i Nomena Jacques Euraldo , araka ny zavatra navoakany tao amin'ny Pejy fesiboky "Malagasy en France" tamin'ity volana Febroary 2026 ity.

NY ATAO HOE "CRUISE SHIP"

Sambo lehibe mpitondra mpandeha mpanao vakansa na koa hoe "Hôtel flottant" ny « cruise ship ». Any ivelany dia efa tena malaza be sy maro mpankafy ny fandehanana amin'izy ireny. Manomboka amin'ny zaza hatramin'ny antitra dia tia mandeha sambo "croisière" avokoa. Misy aza moa ny vazaha efa misotro ronono dia efa namany mipetraka anatin'ireny sambo ireny satria mijanona am-bolana maromaro ao, dia mody kely herinandro fotsiny, avy eo miverina indray.

Teratany amerikanina ny ankamaroan'ny mandeha aminy, arahin'ny kanadianina, latino, ny karana avy any Inda, ary ireo firenena maro samihafa. Fa ireo voalaza ireo no tena maro. Arakaraka ny toerana hiantsonan'ny sambo koa no mety hahamaro ny karazana teratany avy amin'ny firenena entin' ilay sambo. Ohatra sambo miantsona any Sina dia mety Sinoa no ankamaroan'ny mpandeha ao. Raha miantsona any Eoropa dia Eopeanina no ankamaroan'ny mpandeha ao, raha any Etazonia dia Amerikanina mazava ho azy.

Maro be ny kaompania mampiasa sambo "cruise ship", raha tsy hilaza afa-tsy ny Royal Caribbean international, MSC, carnival cruise, costa, Norwegian cruise line, Disney,... sy ny maro tsy voatanisa. Isaky ny seranantsambo ao Amerika dia ahitanao "cruise ship" miantsona avokoa avy amin'ireo kaompania samihafa ireo. Ny sambo tsirairay dia samy manana ny zotrany. Ohatra hoe miala amin'ny seranantsambon'i Canaveral, Orlando floride izy dia mandeha mitety toerana maromaro, ohatra cozumel, Mexico, Roatan, Honduras, Costa maya, Mexico, Nassau, Bahamas, dia miverina ao seranantsambon'i Canaveral, Orlando indray. Dia ohatran'izay foana isan-kerinandro, Santionany fotsiny ireo nomena ireo. Tsy voatery ireo daholo no ataon'ny sambo tsirairay fa samy manana ny azy. Izany hoe anatin'ny herinandro ianao mahatety firenena telo na efatra. Izay no mahatsara azy. Amin'ny maha hôtely azy izay dia marobe ny asa misy sy azo atao, na ho an'ny lehilahy, na ho an'ny vehivavy. Andray indray horesahina ny momba ny asa atao.