[Ankoatry ny vakansa mahabetsaka ny mpandeha, noho io faharatsian’ny lalana io dia misy fiakarany ny sarandalana amin’ny zotra nasiônaly rehetra]

Mihasarotra ny fifamoivoizana manerana an’i Madagasikara noho ny fahapotehan’ny lalampirenena ao anatin’izao vanimpotoanan’ny fahavaratra izao. Toe-javatra, izay mampikaikaika ny mpitondra fiara sy ny mpandeha, na taksibrosy io, na fiaran’olontsotra. Mikasika izay ihany dia nisy ny tafa fohy nifanaovana tamin’ny Filohan’ny Kaoperativa KOPFMM Rakotoarivelo Manantsoa, izay sady mpikambana eo anivon’ny Biraon’ny KMMTF(Komity Miara-Mitantana Tobim-piantsonana Fasankarana:

« Ny faritra rehetra amin’izao ratsy lalana : faritra atsimo atsinanana, toy izany koa Miandrivazo-Morondava. Ny lalampirenena RN7 iray manontolo ratsy lalana avokoa, ao anatin’izany ny eo anelanelan’i Sakaraha-Toliara.Fiantraikan’izay dia mitombo ny ora anaovana ny lalana, ny fiara koa mihasimba. An-danin’izay, ny fanjakana milaza hanao ny asa maika fanamboaran-dalana. Ny fangatahan’ny mpitatitra, mba tokony hojeren’ny fanjakana ny hanampiana ny mpitatitra eo amin’ny fividianana piesy sy kojakojan’ny fiara, izay tena sarotra sy lafo amin’izao”.

Ankoatry ny vakansa mahabetsaka ny mpandeha, noho io faharatsian’ny lalana io dia misy fiakarany ny sarandalana amin’ny zotra nasiônaly rehetra. Mihatra manomboka ny 19 desambra 2025 mandra-pahatongan’ny 16 janoary 2026 io fiakarana io. Ny sarandalana Antananarivo-Toliara, ohatra, raha 75 000 ariary teo aloha dia miakatra 100 000 ariary.

Manoloana io faharatsian’ny lalana io dia efa mandeha ny fanamboarana. Mikasika ny lalampirenena fahafito eo anelanelan’Antananarivo sy Antsirabe, ohatra, dia toy izao ny fepetra noraisin’ny minisiteran’ny Asa Vaventy mikasika izany, araka ny nambarany ao anaty pejiny FB :

“Hita sy tsapa ary heno ny fitarainan'ny mpampiasa lalana amin'ny fitombon'ny faharatsian-dalana miainga eto Antananarivo hatrany Antsirabe, nohon'ny fikikisana ireo sosona rehetra efa ratsy tamin'ny lalana. Dingana tsy maintsy natao anefa izany fikikisana izany, mialohan' ny fanarenana vaovao hatao. Efa vonona avokoa ny akora rehetra hanaovana ny "couche de base", ireo vatokely hanaovana ny "enrobé", efa vonona koa ny "bitume" fa nohon'ny rotsak'orana lasa mialohan' ny fotoana anefa dia tsy mbola afaka miroso amin'ny fanaovana izany aloha ireo orinasa.

Vahaolana vonjimaika noraisina mandra-paha, hanamaivanana ny fahasahiranan' ny mpampiasa lalana, ny fandrarahana vatokely sy ny hipasohana ireo lavadavaka rehetra misy amin'izao. Efa am-perinasa manatanteraka izany ireo Orinasa. Rehefa tsy sakana intsony ny toetr'andro, dia hiroso avy hatrany amin'ny dingana fanamboarana manaraka ireo Orinasa.”

Ami Ral