“Taombaovao malagasy” na Alahamadibe :
« Tsy maintsy tsinan’Alahamady foana fa tsy azo ovaina”, hoy ny tao Anosimanjaka !

[Raha iverenana ny zava-nitranga manodidina ny fankalazana ny “Alahamadibe” teto Anosimanjaka, ny alakamisy 19 marsa dia natokana ho andro “fidiovana”, izay nitohy tamin’ny alalan’ny fitondrana ny “afo tsy maty” ny harivan’io.]

Nankalaza ny “Alahamadibe”, na ny “taombaovao malagasy” araka ny ahafantaran’ny maro azy ankehitriny koa ny tao Anosimanjaka ny herinandro lasa teo iny. “Ny alahamady dia tsy maintsy tsinan’Alahamady foana, fa tsy azo ovaina manaraka ny traikefa, na volana inona io, na volana inona io…Fa tsy hoe tsy maintsy marsa, na avrily foana ». Io no anisan’ny nambaran’ny tao Anosimanjaka nandritra ny lanonana fankalazana ny “Alahamadibe” notanterahina tao an-toerana ny andron’ny zoma 20 marsa teo. Ny Solontenan’ny terak’Antehiroka no nilaza izany, tao anatin’ny fotoana nanatanterahany ny “fafy rano” , na “tsodrano”, mialohan’ny hanaovana ny famonoana omby. Marihina fa amin’ny maha-mponina voalohany sady tranainy indrindra ny terak’Antehiroka teto Anosimanjaka sy ny manodidina dia izy no nomena fahefana hanao fisantarana rehefa misy zavatra atao, na lanonana ara-drazana io, araka ny fomban-tany. Izy ihany koa no nanatsatoka lefona voalohany tamin’ny omby novonoina teto. Mbola nohamafisin-dry zareo Zanadranavalona sy Anosimanjaka indray izany fomba izany teto.

Hentitra

Hita amin’izao fa hentitra amin’ny fanajana ny fomban-taniny sy ny fomban-drazany ry zareo Zanadranavalona sy Anosimanjaka ireto. Izany rehetra izany dia efa karazany ahafahana mitaratra mialoha sahady fa tsy afaka hanaraka ny famaritana daty iombonana ankoatry ny “tsinan’Analahamady” ho enti-mankalaza ny “taombaovao malagasy” ry zareo Zanadranavalona sy ny eto Anosimanjaka. Tsiahivina ihany fa efa misy ny volavolan-kevitra mikasika izany, izay kasain’ny mpitondra ankehitriny haroso hodinihina any amin’ny “fikaonandoham-pirenena” rehefa tonga ny fotoana hanatanterahana izany aoriana ao. Raha iverenana ny zava-nitranga manodidina ny fankalazana ny “Alahamadibe” teto Anosimanjaka, ny alakamisy 19 marsa dia natokana ho andro “fidiovana”, izay nitohy tamin’ny alalan’ny fitondrana ny “afo tsy maty” ny harivan’io. Nandritra io andro io koa no nanaovana ny fanomanana ny toerana handraisana ny lanonana. Loko marevaka ran’ombalahy no nampiasaina teto. Omby miisa efatra no novonoina sy nozaraina natao “nofon-kena mitam-pihavanana” teto ny andron’ny zoma nankalazana ny “Alahamadibe”. Notsiahivina teto fa ny mpanjaka Ralambo, araka ny tolokevitra natolotry ny mpanolotsainany Habib na Rabib- izay nahatonga ny anarana hoe Ambohidrabiby-, no nanapaka fa ny andro Alahamady no atao hoe andro voalohany sy volana voalohanay amin’ny taona, izany hoe “taombaovao”. Mizara andro telo ny Alahamady ka ny andro voalohany na vava Alahamady no lehibe indrindra, izay atao hoe Alahamadibe.